دبارة اليوم :
دبارتنا ليوم ساهلة و على خاطر يهمنا مكتوبك و مصروفك
اخترتلكم حويجة بنينة و كلها منفعة و باقل الاسوام .
الخبيزة و ما ادراك ما الخبيزة
ناخذو اربع ربايط من الخبيزة ..
نقطعوهم مليح
يتغسلو مليح مليح و نحطو فيهم نكيتة خل و لا جفال ( لزوم التعقيم و النظافة) نخليوها تسقطر من الماء مليح
و عنا كسكاسنا فيه الماء يغلي
نحطو هاك الخبيزة الي قطعناها
و نخليوها تفور على روحها
نجيو توة للتختوخ او مرقة السقاء :
عنا البصل نقصوه صغير انت و الكمية لي تستحقها
نخليو بصلنا يتقلى في تشيّشة زيت
رشة ملح
نحطو مغيرفة طماطم
مغيرفة هريسة عربي/هروس
نهرسو راس ثوم مع التابل و الكروية/ راس حانوت
تشيّشة فلفل زينة
تشيّشة كركم
و نحركوهم و نزيدوهم الماء بالشوية نتبعوه تبع .
كي يبدى تختوخنا يزغرد و لا يبكبك نكملو كمية الماء لي عنا .
حتى تاقف ع زيتها .تتسمى طابت و شربت افاحها .
و الخبيزة تفورت و خرجت هاك الريحة الفاوحة و ولات طرية
نجيبو طنجرة اخرى نفرغوها فيها و نصبو هاك التختوخ الموزوز و نسقيوها و نتبعوها .
نرجعوها ع الغاز، للتجمير و تشرب مرقتها
و نزينوها بڤرينات برلعبيد و صحة و فرحة .
Comments
Post a Comment